صدق أولا تصدق

صدق أو لا تصدق

***********
تصدق انك بتشرب مبيد حشري
تصدق انك بتشرب منظف ارضيات
تصدق انك بتشرب بنزين
تصدق انك بتشرب زرنيخ كمان
آه
كل ده ومره واحده وفى وقت واحد
ولو مكنتش بتشرب أكيد بتستنشقهم من غير ما تحس.......
هتقولي إزاي؟؟؟
تخيل كده انك ماسك علبة البيرسول وبترش منها جوا بؤءك
أو رحت محطة بنزين ومسكت خرطوم البنزين وشربت شوية
هتقول ايه الهبل اللى بيتقال ده!!!
في شيء منتشر بين الشباب والكبار كمان(عشان منزعلهمش) والكل عارف انه مش كويس
وبرضه مش بنمنع نفسنا عنه
التـــــــــدخيــــــــن
أى
السيجـاره
منتشر بشكل واسع جدا بين الرجال والستات بإختلاف الأسباب
وآه
مكدبناش لما قلنا إنك بتشرب مبيد حشري ومنظف ارضيات وبنزين وزرنيخ
لان التبغ اللى بيتكون منه السيجاره موجوده فيه كل الحاجات دي وازيد شويات
وآه
مكدبناش لما قلنا اننا لو مبنشربوش اكيد بنستنشقه من غير ما نحس
لان ده اسمه التدخين السلبي
ورغم حملات التوعيه عن السيجاره واضرارها
ورغم ان علبة السجاير اللى صنعها بيبريء ذمته بإنه يكتب عليها
(السجائر مضرة بالصحة)
واحنا بنعمل نفسنا مش واخدين بالنا
ورغم اننا شايفين نتيجة التدخين فينا وحوالينا
ولسه مصممين
ولان كل يوم بيزيد عدد المدخنين
انا لما بدخن بأذي نفسى وغيري كمان
ولانه منتشر مش بس بين الاولاد ، لا والبنات كمان.........آه البنات
قلنا ننزل ونشوف الشباب شايفين الحكاية إزاي؟؟؟
هل هو موضوع رجولة؟
ولا روشنه؟
ولا لان الموضوع مش فارق؟
وازي بدأت الحكايه؟
و الاصحاب السبب ولا البيت ولا مين السبب؟؟
وليه رغم اننا عارفين انها بضر لسه بندخن؟
والبنات:
تقبلي تصاحبي واحدة بتدخن؟
تقبلي تتجوزي واحد بيدخن؟
والاولاد:
تقبل تتجوز واحده بتدخن؟
ومن هنا
بدأنا الحكاية
والاجوبه بجد كانت حكايه
ااه طبعا اتجوز .....لا طبعا متجوزش........اصاحبها هو ده كلام......هيخاف عليا انا...... .....البنت غير الولد.....قلم بدل السيجارة

محمد23 سنه: ممكن يكون التدخين حاله نفسيه، انا فى يوم كنت مضايق قلت اجرب أهو اطلع زعلي فيها ومن هنا بدأت ادخن،وحاولت كتير ابطلها معرفتش
أصلها حكاية عادة بقالى 5 او6 سنين بدخن ،،مسكت السيجارة بقت عادة،انا شايف ان التدخين عادة والدليل ان لما حد بيحاول يبطل يحط بين صوابعه قلم بدل السيجارة، واصحابي ملهمش دخل انا جربت لوحدي،
لا طبعا مقبلش اتجوز واحده بتدخن لان الرجاله غير الستات، الست لما بتدخن وتتجوز مش بتضرنفسها بس لا والجنين كمان
طالبة بكليه الاداب: مش كل اللى بيدخنوا وحشين ،بابا بيدخن ورغم انه شايل كلى مبطلهاش قللها وخلاص، وحولنا كتير معاه وفشلنا
مبرره ازاى ابطل والدكاتره اللى بيعلجوني بيدخنوا
ممكن اتجوز واحد بيدخن لان مش شرط كل اللى بيدخنوا يبقوا مش كويسيين
ومينفعش اصاحب بنت بتدخن لان المجتمع اللى اتربينا فيه وعشنا فيه مش هيقبل بنت بتدخن
التدخين بالنسبة للاولاد غير التدخين بالنسبة للبنات
حاصل على بكالوريوس تجارة29سنه: بدأت ادخن من اولى كليه، وكان تعبير عن الضغط العصبي والمزاج الكويس كمان،،مش عارف ليه مببطلهاش
وعمري ما اتجوز بنت بتدخن...... ليـــــــــــه؟؟
لان التدخين عند البنت بيعبر عن الانحراف وكمان هيضرها في الانجاب
واصحابي كانوا هما بداية التدخين
لكن معظم الشباب بيدخنوا عشان يترسموا قدام البنات
شيماء 21سنه: شايفه ان التدخين بسبب ان العقيدة مش سليمه لان لو في عقيدة صح مش هأذي نفسي،،واخويا دخن بسبب شله اتعرف عليها فى سيبر
بس كانت مجرد تجربة وخلاص
لا طبعا طبعا...متجوزش حد بيدخن لانه مخفش على صحته هيخاف عليا انا
و لا اصاحب بنت بتدخن
خريج30 سنه: بدأت ادخن من اولى ثانوي واحد صاحبي جربت معاه
وبقت عاده
ورغم انى عارف انها بتضر الا انها بقت عاده خلاص
والبنت لما تدخن غير الولد
طالبه20 سنه: ممكن اتجوز واحد بيدخن لو كان كويس..... اخويا شربها بسبب خناقه.. البيت كله اتقلب عليه فتعرف على شله فاسده فشرب سجاير
عمري ما امشي مع بنت بتدخن.

وانتم بقى شايفين ايه؟؟؟

تحقيق أجرته : ميناس صلاح الدين